Неодамна, во издание на издавачката куќа ВИГ „Зеница“, излезе од печат најновата поетска збирка „Кадуцеј и лира“ од Сузана В. Спасовска. Книгата содржи 85 песни поделени во 10 циклуси.

Рецензент на изданието е Ферид Мухиќ, кој меѓу другото пишува: „Секоја од овие осумдесетина песни е испеана суверено, ерудитски поткрепено, преточена со високо мајсторство во лирски префинети стихови исполнети со епска сила. Таа моќна, витална енергија претставува непосреден ефект на начинот на кој Сузана В. Спасовска поетски ја толкува величественоста на Љубовта, Копнежот и Смртта, како најзначајни феномени и клучни координати на човечкиот живот.

Наместо рутинската патетика со која толку често се версифицира Смртта, во песните од оваа исклучително значајна збирка, одѕвонува сонорниот пев на човекот херојски соочен со свеста за сопствената финалност; наместо да биде прикажана со ноторно озлогласената млака сентименталност и трогателната патетика, Љубовта е потврдена со печатот на својата кралска благородност и дигнитет, со сета онаа зашеметувачка магичност достапна само на висококултивираните духови.“

Книгата е поддржана на Годишниот конкурс за финансирање проекти од културата на Министерството за култура на РСМ.

(Текстот е објавен во „Културен печат“ број 133, во печатеното издание на весникот „Слободен печат“ на 18-19 јуни 2022)