Македонскиот актер и стендап комичар Никола Тодороски го објави своето најново шоу „Вештачка интелигенција, природна глупост“ на неговата веб-страница (www.nikolatodoroski.com). Со ова шоу Тодороски настапуваше во стендап клубови во Охрид, Скопје, Софија, Загреб, Белград, Љубљана. Сега публиката има можност онлајн да ужива во 80-минутна интензивна комедија, а шоуто е снимено во култниот клуб „Џез ин“ во Охрид.

– Кој го гледал знае, кој не, пропуштил – вели во свој стил Тодороски.

– Уживав во создавањето на ова шоу во кое две години заедно со публиката се шегуваме и се смееме на сѐ што во тој период ни било најгорко. Сега сакам шоуто да остане онлајн и публиката да може да го гледа кога ќе посака. Она што најмногу ми прави ќеф е дека сето ова е креирано од нула и е тотално независен проект. Единствени што инвестирале во ова парче уметност сме јас и публиката, за што сум бескрајно благодарен – рече Тодороски.

(Текстот е објавен во „Културен печат“ број 29, во печатеното издание на „Слободен печат“ на 1-3 мај 2020)