Српски Курир го цитира Боки 13: Ако ме убиете, ќе се отвори Пандорината кутија – Владата ќе падне
Бојан Јовановски – Боки 13, кој е еден од осомничените во случајот „Рекет“ за време на полициското сослушување после неговото приведување наводно рекол дека поседува докази против премиерот Зоран Заев и неговиот советник Зоран Башановиќ, кои ги сочувал кај мајка му и на повеќе адреси, објавува српски Курир.
– Ако ме убиете во затвор, ќе паднат многу политичари, а тука мислам пред се на Заев и неговата влада. Имам докази против Заев и државниот врв. Се од прва рака. И се оставив на сигурно, кај мојата мајка и на уште неколку адреси. Ако нешто ми се случи, ако ме убиете, обесите и тоа се обидете да го прикажете како самоубиство, ако овде ме тепате, мачите, застрашувате, убаво ви кажувам, да не испадне после дека не сте знаеле, во Македонија ќе има политички земјотрес. Ќе се отвори Пандорината кутија, никој нема да биде поштеден – рекол, според српски Курир, Боки 13 на сослушувањето.
Весникот објавува и дека Боки 13 не е сам во притвор, туку собата во затворот ја дели со уште еден притвореник поради безбедноста проценка.