Денеска пред седиштето на Министерството за образование во Скопје започна најавениот протести на средношколците кои бараат во местата каде има мал број на заразени со Ковид-19 да се отворат училиштата, односно да се продолжи со настава со физичко присуство на учениците.

Од претходно беше донесена одлука сите ученици над трето одделение, вклучително и средношколците да следат онлајн настава.

Од она што го гледаме на терен средношколците се излезени во голем број, а рутата ќе трае до Владата каде гласно ќе го искажат својот револт. Според зборовите на Сојузот на средношколци, Бленди Ходаи, дел од барањата на средношколците се Комбинирано или хибридно учење како најефикасен начин на учење за време на пандемијата, засновано врз епидемиолошката состојба на градовите, како и училиштата да бидат во можност да ги поделат учениците во групи, со тоа што дел од нив ќе следат настава на далечина, а други пак настава со физичко присуство.

Дел од присутните носат транспаренти со натписи како ,,Владата онлајн, учениците офлајн”, ,,Стоп за неквалитетно образование”, како и ,,Сакаме да учиме”. На протестот се присутни и родители на некои од учениците,а покрај средношколци присутни се и основци.

И родителите и средношколците пред МОН скандираат ,,Сакаме да учиме”, а потоа ќе се упатат кон Влада.