Напредокот во конкретни теми од т.н. позитивна агенда меѓу Грција и Турција, трговските и бизнис односите, перспективите за соработка во транспортот и телекомуникациите, како и зајакнување на соработката во справувањето со предизвиците поврзани со животната средина, биле дел од темите кои ги разгледале заменик- шефовите на грчката и турската дипломатија, Костас Франкојанис и Седат Онал.

Од Министерството за надворешни работи на Грција соопштија дека денешната работна средба на Франкојанис и Онал во Атина е „во рамките на иницијативата за позитивната агенда во дијалогот со Турција во економскиот и трговскиот сектор”.

-Двете страни изразија задоволство за напредокот постигнат во конкретни прашања, особено во почетокот на преговорите за потпишување Меморандум за соработка меѓу „Enterprise Greece” и соодветната турска организација „Invest in Turkey”, во взаемното признавање на сертификатите за вакцинација против Ковид-19, за напредокот на Мешовитиот комитет за туризам, како и за повторното активирање на Мешовитиот економски комитет, соопштија од грчкото МНР.

Ова е трета средба на Франкојанис и Онал во рамките на иницијативата за позитивната агенда, договорена меѓу министрите за надворешни работи на Грција и Турција, Никос Дендиас и Мевлут Чавушоглу, во април 2021 година.

Неповрзано со денешната средба, утре, во Атина ќе се држи новиот, 64-ти круг од прелиминарните контакти меѓу Грција и Турција.

Прелиминарните контакти беа активирани лани по пауза од речиси пет години, а изминатата година се одржаа три круга, два во Турција и еден во Грција, а последниот беше на 6 октомври во Анкара.

Станува збор за неформални контакти, а не за преговори, нема обврзувања меѓу двете страни, нема договорен записник, не присуствува трета страна и нема информирање за содржината на разговорите, додека пак целта е доколку има поклопување на ставовите во иднина евентуално да се одржат преговори