Репрезентацијата на Данска има шанса да биде само четвртата земја која ја одбранила светската титула шампион, претходно тоа им успеа на Шведска, Романија и Франција.

Селекцијата предводена од Николај Јакобсен денеска од 17.30 часот во големото финале на Мундијалот во Египет ќе ги одмери силите против Шведска.

Судии на овој меч се Шпанците Лопез и Сабросо, а Драган Начевски од Македонија ќе биде еден од официјалните лица.

Данците и пред две години беа во скандинавско финале, со 31:22 славеа против Норвежаните. Интересен е податокот што Шведска после 21 година повторно на египетско тло е во борба за златото, тогаш во далечната 1999 година се искачи на тронот со триумфот над Русија (25:24).

Швеѓаните атакуваат на петтата светска титула, со злато се закитија уште во 1954, 1958 и 1990 година.

Да додадеме уште дека претходно од 14.30 часот се игра натпреварот за третото место помеѓу Шпанија и Франција. Доколку Французите загубат, а Шведска дојде до титулата, тогаш Швеѓаните на врвот на вечната листа ќе се одвојат со најмногу медали на светските шампионати, вкупно 12.