Советот на обвинители за случајот со мазутот: Одговорност на обвинител се утврдува со докази, а не врз основа на политички изјави
Одговорност на обвинител се утврдува со факти и докази, а не врз основа на политички изјави или јавен притисок, велат за „Слободен печат“ од Советот на јавни обвинители . Ова доаѓа по барањата на владејачката ВМРО-ДПМНЕ ова тело да реагира за запирањето на постапката за злоупотреби со мазутот и секојдневните обвинувања и прозивки за шефот на Обвинителството за гонење на организиран криминал и корупција Ислам Абази и обвинителката Катерина Коларевиќ, која ја донесе одлуката да се запре истрагата со образложение дека нема докази.
Препорачано
-Јавнообвинителските одлуки во конкретни предмети се носат во согласност со Законот за кривичната постапка и за нив е предвидена соодветна процедура за правен лек. Советот на јавните обвинители постапува исклучиво во рамки на своите законски надлежности и не е орган кој може да влијае врз текот или исходот на конкретни истражни и обвинителски постапки. Согласно Законот за Советот на јавните обвинители и Законот за јавното обвинителство, Советот ја гарантира самостојноста на јавните обвинители и нема законска надлежност да дава насоки, наредби или да влијае во однос на одлуките што ги носат обвинителствата во конкретни предмети – велат од Советот.
Оттаму додаваат дека Советот не може да коментира, ниту да прејудицира одлуки донесени во рамки на законски утврдени постапки од страна на надлежното јавно обвинителство.
-Доколку постојат сомнежи за незаконито, нестручно или несовесно постапување на јавен обвинител, Законот предвидува посебни механизми и постапки за утврдување одговорност, кои се водат врз основа на конкретни факти и докази, а не врз основа на политички изјави или јавен притисок. Советот останува доследен на принципите на владеење на правото, поделба на власта и самостојноста на јавнообвинителската функција, без да дозволи какво било политичко влијание врз постапувањето на јавните обвинители – додаваат од Советот.
Минатата недела Обвинителството соопшти дека истрагата за наводни злоупотреби со мазутот, била запрена за Ратко Капушевски и неговата фирма РКМ, Асмир Јахоски – сопственик на „Пуцко петрол“ и син на пратеникот на ДУИ, Исмаил Јахоски, поранешните директори во ЕСМ, избеганиот Васко Ковачевски и Адриан Муча, Ерџан Сулкоски и уште осум други осомничени.
