Совети од флористката Ане Блу: Растенија што виреат и во домови со ограничена сончева светлина
Намалената количина на сончева светлина во текот на дневните часови можеби нема да значи многу за вас, но на поголемиот дел од салонските растенија кои го красат вашиот дом или работен простор им е од големо значење.
Доколку живеете во дом кој во текот на денот е помалку изложен на природна светлина, тоа не значи дека не треба да чувате растенија, само треба да го направите вистинскиот избор. Постојат голем број на салонски растенија кои одлично се прилагодуваат услови со ограничена сончева светлина, а притоа тоа не делува на нивниот изглед и раст.
За да го направиме вистинскиот избор на најдобрите растенија кои се соодветни за простории кои недоволно се изложени на природна светлина поразговаравме со Ане Блу, професионален флорист и креатор на цветната онлајн галерија и шоп „Ane Blue Flowers“.
Замија
Замијата е на врвот на листата на салонски растенија со најскромни барања. Растение кое ќе го оплемени вашиот дом, а притоа нема да бара многу за возраст. Брзо се разгранува и во услови кога има недостаток на светлина.
Ова зимзелено растение потекнува од Африка, а поради раскошниот изглед и лесното одржување во последниве неколку години стана особено популарно како собно саксиско растение.
Многу често може да се забележи како разубавува нечија канцеларија, новоотворен бутик или салон за убавина. Според фенг-шуи верувањата, ова интересно салонско растение ќе ви донесе пари, среќа и успех како на работен план така и во домот, а притоа гарантирано ќе ви донесе чист воздух. Дебелите мали ливчиња што наликуваат на парички се одличен, природен „нано-филтер“.
Сансеверија
Сансеверијата е многу отпорно декоративно собно растение чии листови кои наликуваат на сабја растат и кога нема доволно светлина. Прилагодливо е доколку живеете во мал стан или работите во мала канцеларија бидејќи расте во висина и не зафаќа многу простор.
Дури и ако на вашиот дом му недостасува квадратура, внесувањето зеленило е од суштинско значење за да го оживеете.
Растенијата во затворените простори додаваат повеќе убавина, а исто така обезбедуваат функционални придобивки, како што се промовирање на позитивно расположение, прочистување на воздухот и создавање чувство на поврзаност со природата дури и кога не сте во можност да излезете надвор.
Сансеверијата се одржува многу лесно, се наводнува ретко и може да опстане во која било просторија во вашиот дом или во канцеларија.
Потекнува од тропските делови на Јужна Африка. Идеално е за одгледување кај луѓе што имаат премногу работни обврски, бидејќи не бара премногу нега.
Сансеверија е позната како еден од најдобрите прочистувачи на воздухот во затворени простории. Ова растение испушта кислород во текот на ноќта и го прочистува воздухот од токсини, со што значително се подобрува сонот, а оваа карактеристика го прави подобно доколку сакате да ја раззелените и спалната соба.
Потос
Брзо-растечко и благодарно растение кое не бара многу светлина или нега, а постојано ве наградува со нови листови. Како ползечко растение, совршено ќе се вклопи на некоја висока полица во домот.
Едноставно, растение кое не се плаши од темнина. Останува зелено и кога е многу малку изложено на сончева светлина. Поради неговите карактеристики народски е познато и како ѓаволска лоза или ѓаволски бршлен.
Има повеќе видови на потос кои се разликуваат во бојата и шарата на листовите, но сите се доволно моќни да опстојат во потемни простории.
Драцена Флагранс
Салонско растение, палма кое ужива на средна светлина, но може да толерира услови на слаба осветленост. Потребна е само минимална грижа за да произведе убави зелени листови.
Драцената восхитува со својот раскошен и тропски изглед кој ќе се погрижи да ја исполни просторијата со свежина, а притоа е позната како одличен природен прочистувач на воздухот во затворени простории.
Аглоанема
Во последно време убавината на ова салонско растение ги освојува социјалните мрежи. Често може да наидеме на фотографии каде ова растение е дел од нечиј ентериер.
Аглонема е растение кое потекнува од Филипините, Борнео и Индонезија, има интересни листови прошарани со разнолики бело – сребрени шари кои достигнуваат должина околу 15-20 сантиметри. Аглаонемата едоставно ужива во сенка, но може да поднесе и сончева светлина.