Со натпреварот МЗТ Скопје Аеродром-Работнички кој се игра вечерва 19.30 часот во СРЦ „Кале“ во машка конкуренција како и со дуелот Баскет КАМ и Бадел 1862 (17 часот) во женска конкуренција, и официјално ќе стартува новата сезона во македонската кошарка.

Честа да ја отворат новата сезона ја имаат вечните ривали МЗТ Скопје и Работнички и тоа во Суперкупот кој го носи името „Драган Василов Цевка“.

„Металците“ кои минатата сезона ја освоија двојната круна, во вечерашниот натпревар ќе влезат ослабени поради повредите на неколку кошаркари, но и покрај тоа желбата е трофејот да се однесе во Аеродром.
– Ќе биде убаво доколку сезоната ја започнеме со освојување на трет пехар во серија. Суперкупот е натпревар кој е увертира за новата натпреварувачка сезона во кој нас нè чекаат многу натпревари. Би требало да биде релативно ревијален тип на натпревар. Имавме проблеми со повредите во целиот тек на подготовките и до последен момент не знам кои играчи ќе ги имаме на располагање за овој меч. Се надевам на една спортска приредба, и на крај, да ја започнеме сезоната со победа. Ќе биде интересно, во секој случај, да видиме до каде сме во овој момент- вели тренерот на МЗТ Скопје Аеродром, Дарко Радуловиќ.

Од друга страна Работнички во овој натпревар и во новата сезона влегува со реновиран тим и со нов тренер во Тони Симиќ.

– Ова е еден сосема нов проект на Работнички, каде што целосно е променет играчкиот, тренерскиот, и дел од раководниот сегмент во клубот. Направен е еден целосен „ребилдинг“ на сите нивоа. Сигурно е дека ни треба време да се воиграме. И мора да се биде трпелив во тој поглед – смета Симиќ.

Денеска исто така се игра и Суперкупот во женска конкуренција во кој се среќаат двете најдобри екипи од минатата сезона, Баскет КАМ и Бадел 1862.
Од 17.часот, во салата на СРЦ „Кале“ во Скопје, двата фаворити за највисок пласман и во оваа сезона која доаѓа, но и учесници на ВАБА лигата, ќе се борат за првиот трофеј.

Освојувачот на двојната круна Баскет КАМ во новата сезона ќе биде без Анџелика Митрашиновиќ, Ивана Кметовска, како и странците Гобељиќ и Брајковиќ, а на нивно место се ангажирани Адиџат Адам, Снежана Алексиќ, Кристина Балтиќ.

– Играме против добар тим, кој исто така ќе игра и во ВАБА лигата. Имаме млади кошаркарки од кои очекуваме прогрес, потпомогнати со оние играчи кои доаѓаат од страна. Ние треба да им го овозможиме тоа, и да бараме максимална ангажираност од сите, на секој натпревар- вели тренерот на Баскет Кам, Александар Алексиев.

Не менувавме многу во паузата меѓу двете сезони, сега ги имаме Кметовска и Кетлин кои ќе ги покриваат центарските позици во екипата која оваа година ќе игра  во ВАБА лигата. Оттука, ова е убава можност за проверка и наша и на противникот, кој за разлика од нас, направи доста промени во ростерот. Особено пред оние први мечеви од Јадранската лига кои следуваат веќе од наредната седмица- вели Перо Стамески, тренерот на Бадел 1862.