Надлежните денеска избришаа од евиденцијата околу 6.500 активни случаи на ковид-19 – според официјалниот дневен корона-извештај, во текот на изминатиот ден имало дури 7.170 оздравени пациенти.

Ова се случува откако периодот на изолација, кој досега траеше десет дена, со одлука на Кризниот штаб, а врз основа на предлог на Комисијата за заразни болести, од десет, беше намалена на седум дена за пациентите кои се позитивни, а немаат симптоми. Како образложение беше наведена полесната клиничка слика предизвикана од сојот омикрон на коронавирусот.

Со „чистењето“ на евиденцијата, во денешниот извештај на ИЈЗ се бележат 13.628 активни случаи, што е многу помалку од вчера забележаните 20.109. Ова намалување на бројот на активни случаи е второ најголемо, откако и минатата недела за едно деноноќие беа регистрирани над 7.200 оздравени пациенти.

Денеска беа регистрирани нови 711 пациенти заразени со коронавирусот, а продолжи загрижувачкиот тренд на висок број на смртни случаи, со регистрирани 24 починати пациенти, од кои најмладиот имал 29 години.