Саботно џез-матине на Скопскиот џез-фестивал, со промоција на новите календари за 2023 година и концертeн настап на Јордан Костов, Дориан Јовановиќ и Андреа Мирческа, ќе се одржи на 14 јануари, со почеток во 13 часот, во „Макка бар“ (бул. Св. Климент Охридски 60) во Скопје.

Станува збор за традиција која Скопскиот џез-фестивал ја негува години наназад. Џез-календарот со текот на времето стекна колекционерски статус и стана важна реликвија на секој џез-поклоник во државата. Секој месец од календарот за тековната година носи фотографија со некој од изведувачите на минатогодишното издание на џез-фестивалот.

Автор на фотографиите е познатиот словенечки фотограф Жига Коритник, кој повеќе од 20 години е редовен посетител на скопскиот фестивал.

Фотографиите се изработени на врвно професионално и естетско ниво, кое е пренесено и во календарот во целост, а Скопскиот џез-фестивал е еден од ретките во светот кој својата програма, музичарите и џез-музиката, воопшто, ја промовира на овој начин.