Ситуацијата во Бразил не се смирува: За еден ден потврдени 11.687 нови случаи на коронавирус
Во Бразил се потврдени 11.687 нови случаи на коронавирусот, со што вкупниот број на заразени порасна на 374.898, се наведува во официјалниот извештај за епидемиолошката ситуација во таа земја.
Во документот, кој е објавен вчера вечерта, се наведува дека за 24 часа починале уште 807 луѓе, со што вкупниот број на смртни случаи во земјата поврзани со коронавирусот се зголеми на 23.473.
Главното жариште на заразата е Сао Пауло во која живеат повеќе од 21 милион луѓе.
Во ридовите над Сао Паоло, на гробиштата Вила Формоса се бескрајни нови гробови, а се чини дека погребите се случуваат на секои 10 минути.
Според официјалните податоци, во таа бразилска држава се заразени најмалку 83.600 луѓе, со 6.200 смртни случаи.
Во Рио де Жанеиро се потврдени 39.298 случаи на зараза, а починати се 4.105 луѓе, додека во Сеара се заразени 36.185 луѓе, со 2.493 смртни случаи.
Бразил оваа недела изби на второто место на светот по бројот на заразени, после САД и има повеќе од 330.000 потврдени случаи од коронавирус. И покрај тоа, бразилскиот претседател, кој ковид-19 го нарекува „мал грип“, ги повика претпријатијата повторно да отворат.
Администрацијата на бразилскиот претседател минатата недела одобри употреба на хидроксихлорокин, лекот против маларија, кој американскиот претседател Доналд Трамп го промовира како терапија за Ковид-19.
Сепак, лекот против маларија кој се промовира како потенцијален лек во лекувањето против вирусот Ковид-19, не се покажа како ефикасен против оваа болест, туку напротив, ја зголемува смртноста кај пациентите кај кои е применуван, покажаа анализи објавени минатиот месец од американските болници каде бил користен во терапијата. Исто така, нови студии деновиве тврдат дека „лекот на Трамп“ е бескорисен.
Клиничкото испитување на лекот за маларија хидроксиклорокин во лекувањето на ковид-19 привремено е прекинато поради загриженоста околу неговата безбедност, објави вчера директорот на СЗО, Тедрос Адханом Гебрејесус.