По успешната самостојна изложба во Куќата на Уранија – МАНУ во Охрид во август, од 8 до 22 октомври во Музејот на град Скопје (МГС) е отворена изложбата „Скаменети потези“- синергијата помеѓу мозаикот и сликарството на уметницата Аница Китаноска.

Поставката ја истражува синергијата помеѓу сликата и мозаикот, каде истиот мотив се преобразува во различни форми и медиуми. Овој дијалог создава простор за споредба, интроспекција и согледување на слоевите на фрагментот и целината.

– Гледачот може да види како истата идеја се артикулира низ различни техники, и како делот и целината коегзистираат во едно визуелно искуство – објаснува авторката.

Кураторката Гордана Велков додава дека поставката „го издига мозаикот од рамката на чиста декорација и го става во сфера на размислување, каде секој потег носи емотивна и аналитичка длабочина, а секој фрагмент ги активира сетилата и мислата на гледачот.“

Аница Китаноска (р. 2000, Вевчани) е визуелна уметница од новата генерација што го обновува мозаикот во современата уметничка сцена. Дипломира и магистрира во Академијата за ликовни уметности во Равена, Италија, специјализирајќи современ мозаик.

Нејзините дела се изложувани во „Rijksmuseum“ (Амстердам), Франција, Скопје, Равена, Карара и тн. Добитничка е на Националната награда за уметност PNA (Италија, 2023) и член е на ДЛУМ и на Интернационалната асоцијација за мозаик MARTE.