Во Францускиот институт во Скопје на 7 ноември, во 18 часот, ќе биде отворена изложбата со наслов „Фото-графички експерименти“. Изложбата ја прикажува симболичната врска помеѓу фотографијата и графиката како медиуми за визуелна естетика и раскажување приказни.

Станува збор за проект создаден од двете уметници Ана Трајковска и Јана Луловска, што премиерно беше прикажан на настанот „Отворено ателје“ во рамките на нивниот двомесечен престој во престижната институција „Cité internationale des arts“ во Париз.

„Фото-графички експерименти“ е уметнички спој на фотографија, графика и инсталација и претставува омаж на суштината на Париз низ призмата на колаборативната уметност, која повикува на размислување за невидливите слоеви на градот, скриени под површината.

Станува збор за дела во кои, низ уникатен пристап, двете уметници ги истражуваат безвременските културно-историски знаменитости и архитектурата на Париз, како спој на минатото и сегашноста.

Францускиот институт во Скопје ја поставува изложбата по нејзината париска премиера, а во рамките на одбележувањето на 50-годишнината од своето постоење. Изложбата ќе биде отворена за посета до крајот на годината.