Ракометната репрезентација на Македонија во последен момент стана учесник на Светското првенство во Египет кое започнува денеска, откако Чешка мораше да го откаже настапот поради преголем број на заболени ракометари на коронавирус.

Оваа промена во последен момент им донесе огромни главоболки на Швеѓаните кои се прв противник на нашите ракометари (утре 20.30 часот). Иако и Швеѓаните во Египет допатуваа без девет ракометари кои се позитивни на коронавирус, тие подготовките ги одработија подготвувајќи тактика за Чешка, но утревечер ќе играат против Македонија.

– Ова е проблем, секогаш најмногу се анализира првиот противник, па ние два месеци се подготвувавме за Чешка. Дојдовме овде во Каиро знаејќи дека ќе играме со Чешка, а потоа два часа подоцна дознаваме дека ќе играме со Македонија. Сега имаме помалку од два дена за да се подготвиме за овој ривал. Знаеме дека офанзивно е поквалитетен од Чесите, но ќе треба добро да го изанализираме и да се подготвиме – изјави шведскиот селектор Глен Солберг.