Швајцарија денеска објави дека ќе им исплати паушален износ од 50.000 швајцарски франци (околу 54.500 евра) на тешко повредените преживеани и семејствата на жртвите од пожарот во бар во ски-центарот Кран Монтана, во кој загина над 40 луѓе, а повеќе од 100 беа повредени.

Таканаречениот „солидарен придонес“ има за цел да обезбеди брза финансиска поддршка за жртвите и делува како гест на сочувство, соопшти владејачкиот Федерален совет на Швајцарија, забележува Ројтерс.

Во принцип, исплатата ќе се однесува на секое лице кое го загубило животот, како и на секое лице кое било хоспитализирано, според соопштението на Федералниот совет.

Швајцарските власти соопштија дека во пожарот се повредени 116 луѓе. Повеќето од загинатите биле тинејџери, а многу од жртвите биле странци, меѓу кои и неколкумина од Франција и Италија.

Федералниот совет, исто така, соопшти дека ќе започне кругови за дискусија за да им помогне на жртвите, осигурителните компании и властите да постигнат вонсудски спогодби, со што потенцијално ќе се спречат долги правни спорови. Целта е да се придонесат до 20 милиони франци за вакви спогодби.

Советот соопшти дека се надева оти парламентот брзо ќе го забрза донесувањето на законот што го изготви за поддршка на жртвите.

Владата, исто така, планира да издвои 9,26 милиони евра за да им помогне на погодените кантони да ги покријат вонредните трошоци.

Идентификувана е најмладата жртва во трагедијата во Кран-Монтана, имала само 14 години