Шест руски воени бродови одат на вежби во Црното Море: Во Романија пристигнаа првите американски војници
Шест руски воени бродови тргнаа кон Црното Море од Средоземното Море на поморски вежби, јави денеска агенцијата Интерфакс, повикувајќи се на руското Министерство за одбрана.
Ваквата акција, како што беше најавено, е дел од однапред планираното движење на воените ресурси.
Русија минатиот месец објави дека нејзината морнарица ќе изведе сеопфатни поморски вежби од Пацификот до Атлантикот, во кои ќе учествуваат сите нејзини флоти
Во Романија пристигнаа првите американски војници
Првите американски воени трупи за зајакнување на сојузничките сили на НАТО на источното крило пристигнаа во Романија, изјави денеска романскиот министер за одбрана Василе Динчу.
Динчу им рече на новинарите дека првите 100 американски војници се во Романија и дека се ангажирани за логистика, пренесува Ројтерс.
„Повеќе од 100 специјализирани американски војници, заедно со нашите специјалисти за логистика, се подготвуваат, што значи дека нема да помине долго пред да пристигнат останатите војници“, рече Динчу.
Соединетите Држави испраќаат речиси 3.000 дополнителни војници во Полска и Романија за да ја заштитат Источна Европа од потенцијалното прелевање на украинската криза.
Пентагон објави дека ќе ја премести ескадрилата Страјкер од околу 1.000 американски членови од Вилсек во Германија во Романија.
Американските војници во саботата почнаа да пристигнуваат во Полска.
Соединетите Држави во моментов имаат околу 900 војници во Романија, која е членка на НАТО од 2004 година и е домаќин на систем за одбрана од балистички проектили.
Франција, исто така, објави дека планира да испрати војници во Романија.