Голема сензација се случи на првиот ден од „Вимблдон“. Учеството на третиот Грен слем го заврши 10 играч во светот, Хуберт Хуркач, кој беше поразен од Алехандро Давидович Фокина со 7:6 (4), 6:4, 5:7, 2:6, 7:6. (10:8).

Седмиот носител на турнирот лани играше во полуфиналето во кое беше поразен од Новак Ѓоковиќ, а сега е елиминиран уште во првото коло. Многумина го гледаа Полјакот како фаворит од сенка, особено доколку се знае дека тој во Лондон дојде како освојувач на Хале.

Шпанецот поведе со 2:0 во сетови, а во третиот имаше три меч топки при резултат 5:3, а потоа започна да врне дожд. Откако играчите се вратија на теренот, Хуркач заигра подобро, врза четири гема и го освои тој дел од мечот. Полскиот тенисер доминираше и во четвртиот сет и се чинеше дека ќе успее да слави по пресврт.

Во петтиот сет тенисерите разменија два брејка, а потоа во супер тај-брејкот 10 светски тенисер водеше со 6:3, но и тоа не беше доволно за победа. Давидович Фокина се надмина себеси и на крајот обезбеди пласман во второто коло во кое ќе игра против Чехот Јиржи Весели кој со 3:0 го елиминираше Аргентинецот Федерико Кориа.

Ѓоковиќ со победа и рекорд ја започна одбраната на титулата на „Вимблдон“

Џон Изнер потешко од очекувањата славеше против квалификантот Енцо Коко од Франција со 7:6 (6), 6:7 (3), 6:4, 3:6 и 7:5. Успешни на стартот беа и Кокинакис, Мартерер, Манарино и Ембер.

Во женска конкуренција Ема Радукану, домашната натпреварувачка со 2:0 во сетови 6:4 и 6:4 ја елиминираше Белгијката Алисон Ван Ујтванк. Победи забележаа уште Кава, Гарсиа, Ниемејер, Контавејт, Пери, Јуван, Кирстен, Кочарето, Хонтама, Ли, а при резултат 1:1 во сетови и 4:2 во предност во третиот за Мертенс, мечот го предаде Колумбијката Осорио.