Европската комисија одобри внесување на месниот производ „месо од сено“ од Словенија во регистарот на загарантирани традиционални специјалитети, соопшти официјален Брисел.

Тоа е месо од говеда, мали животни и копитари, кои на традиционален начин се хранат со природна сточна храна. Важно е да не се хранат со генетски модифицираната храна, објаснуваат тие.

„Животните пасат на пасиштето во сезоната на растење, а во зима се хранат со сено или сува сточна храна. Овој природен пристап кон хранењето помага во зачувување на уникатниот квалитет на месото и го прави поздраво“, соопшти комисијата, пренесува Н1 Словенија.

Тие додадоа дека оваа единствена форма на преработка на месо е длабоко вкоренета во словенечката земјоделска традиција и претставува еден од најстарите облици на одгледување месо.

„Производството на ова месо е олицетворение на еколошки пристап кон сточарството, што придонесува за заштита на климата и почвата и во исто време ја зголемува биолошката разновидност“, велат тие.

Новата ознака ќе биде додадена на списокот од 92 земјоделски производи кои се веќе заштитени во рамките на шемата за гарантирани традиционални специјалитети.