Најмалку седум алпинисти, меѓу кои петмина странци и двајца Непалци, загинаа кога лавина го погоди хималајскиот врв Јалунг Ри во округот Долака, соопшти експедитивната агенција „Севен Самит Трекс“.

Инцидентот се случил вчера во 9:00 часот по локално време, објави денес Ал Џезира. Спасувачите досега пронашле две тела, додека се верува дека преостанатите пет се закопани под снег. Осум други алпинисти се спасени и се хоспитализирани во Катманду.

Меѓу загинатите се двајца Италијанци, еден Канаѓанец, еден Германец, еден Французин и двајца непалски водичи.

Спасувачките напори се попречени од лошите временски услови и логистичките проблеми, вклучително и тешкотиите со летањето со хеликоптери.

Ова е најновиот во низата опасни настани во Непал овој месец, откако циклонот Монта донесе обилни дождови и снежни врнежи, оставајќи десетици алпинисти заглавени на Хималаите.

Две Британки и една Иркинка беа неодамна спасени во западниот регион Мустанг, додека стотици алпинисти беа заглавени во близина на Еверест.

Спасувачките екипи сè уште работат на пронаоѓање на исчезнатите алпинисти.

Јалунг Ри се наоѓа во долината Ролвалинг во североисточен Непал, а алпинистите се соочуваат со мешавина од карпи, мраз и снег на оваа надморска височина.