Денеска во Младинскиот културен центар (МКЦ) се одржа комеморација во чест на легендата на македонското радиоводителство и музички новинар, Драган Б. Костиќ. Настанот беше полн емоции, сеќавања и почит кон човекот кој остави неизбришлива трага во македонската радиофонија и музичка култура.

Комеморацијата ја водеше Антонио Димитриевски, кој со емотивен и достоинствен говор ги поведе присутните низ животот, делото и значењето на Костиќ за неколку генерации слушатели. Во рамки на настанот беше прочитан и телеграф од претседателката на Република Северна Македонија, Гордана Сиљановска-Давкова, во кој беше истакната неговата огромна улога како медиумски хроничар и културен работник.

Со лични и искрени говори се обратија негови блиски пријатели и соработници Бане Бранислав Димитриевиќ, негов пријател од детството со кој ги делел првите диџејски моменти во диското „Турист“, Петар Георгиевски – Камиказа, вокалист на бендот „Меморија“ и долгогодишен соработник, нашиот познат македонски пејач и драг пријател Дарио Панковски, Ласко Ѓуровски, уметник и карикатурист, како и познатиот скопски диџеј Зоки Бејбе.

Секој од нив сподели лични приказни, анегдоти и спомени кои ја отсликаа човечката и професионалната големина на Драган Б. Костиќ – како пријател, визионер и вљубеник во музиката.

На комеморацијата присуствуваа членови на неговото семејство, бројни луѓе од културата и музичката сцена, колеги, пријатели и верни фанови, кои со долги аплаузи и тишина полна со почит му оддадоа последна почест.

Драган Б. Костиќ почина на 20 декември 2025 година, на 75-годишна возраст. Роден е на 10 јуни 1950 година во Скопје, а својата богата и влијателна кариера ја изгради во Македонското радио. Најшироко е познат како автор и водител на култните радио-емисии „Диско селектор“ и „Заборави ако можеш“.

„Диско селектор“, кој започна со емитување на 29 јуни 1974 година, со децении беше музички компас за неколку генерации слушатели. „Заборави ако можеш“ започна во 1991 година и до 2013 година го доживеа своето 4.500-то издание.

По повод 30 години од „Диско селектор“, во јуни 2004 година, Костиќ организираше голема музичка забава на лизгалиштето во Скопје, која собра околу 6.500 посетители и остана запаметена како еден од најмасовните музички настани од тој тип кај нас.

Тој е автор и на други препознатливи радио-формати како „Радиоурнебес“, „Пријатели, добар ден“ и квизот „Јас ли сум на ред“. Познат беше и како страстен колекционер на музика, со колекција од над еден милион аудио записи – една од најголемите во регионот.

Во 2018 година ја започна и телевизиската емисија „Б со точка“ на Телевизија 24, која се емитуваше во две сезони.

Со заминувањето на Драган Б. Костиќ, македонската медиумска и музичка сцена изгуби голем професионалец, но неговиот глас, вкус и љубов кон музиката ќе продолжат да живеат преку генерациите што ги обликуваше.