Савески и Куновски добија условни казни за демолирањето на канцеларијата на Иванов
Апелација на Здравко Савески и Владимир Куновски им досуди условни затворски казна од по шест месеци за демолирањето на канцеларијата на поранешниот претседател Ѓорге Иванов, за време на „Шарената револуција“ пред шест години. По две ослободителни пресуди од пониските судови, кои ги укина Апелација, денеска судот ги казни со шест месеци условна затворска казна, која нема да се спроведе доколку во наредните пет години не сторат ново кривично дело и надомест на штета во вредност од 8,5 илјади евра.
-Се работи за настан од 12 април 2016 година, кога тогашниот претседател Ѓорѓе Иванов објави општа аболиција на 56 лица, со која најмногу беа опфатени политичари од тогашната власт засегнати од истрагите на СЈО и неколкумина политичари од тогашната опозиција. Оваа одлука на претседателот беше дочекана со жестока реакција од граѓаните, кои истиот ден спонтано го изразија својот револт, собирајќи се пред неговата канцеларија во центарот на градот. Репресивниот полициски апарат на тогашната власт веднаш ја покажа својата жестокост, но и селективност во справувањето со демонстрантите. Од целата толпа – шест лица беа приведени и ставени во куќен притвор, а обвинителството брзо спреми обвинителни акти за водење судски кривичен прогон, се вели во соопштението од Хелсиншки комитет.
Од таму велат дека , казнувањето и справувањето со високиот криминал на функционерите оди бавно, доведувајќи до застареност на кривичното гонење за дела кои вклучуваат милионски суми, а од друга страна, како што објаснуваат за граѓани кои се спротиставија на криминалната аболиција, судските постапки траат шест години и се изрекуваат драконски казни за нивниот активизам.
