Претседателот на Белорусија, Александар Лукашенко изјави денеска дека ќе им нареди на своите војници да се борат со сојузничката Русија само доколку друга земја изврши напад врз Белорусија, јави државната новинска агенција Белта.

Лукашенко, кој постојано ги негираше тврдењата на Киев и Западот дека неговата земја може дополнително да биде вовлечена во војната во Украина на страната на Москва, исто така рече дека планира да се сретне со рускиот претседател Владимир Путин во петок.

„Подготвен сум да се борам со Русите од територијата на Белорусија само во еден случај: ако само еден војник влезе на територијата на Белорусија за да го убие мојот народ“, рече Лукашенко на прес-конференција, пренесува Белта. „Ако ја нападнат Белорусија, одговорот ќе биде најсуров, а војната ќе добие сосема поинаква природа.

Белорускиот претседател рече и дека Русија не побарала Белорусија да војува со неа во Украина.

Неодамнешните воени активности и заедничките вежби на воздухопловните сили на Русија и Белорусија повторно ја разгореа загриженоста дека Минск може да преземе поактивна улога во војната во Украина.