Бугарскиот премиер Кирил Петков денеска изјави дека руски агенти работат против Договорот за добрососедство меѓу Бугарија и Македонија и подобрувањето на билатералните односи меѓу двете земји.

Тој во изјавата за медиумите, која ја пренесе БГНЕС. посочи дека „доста голема руска дијаспора сочинета од агенти“, која е формирана во Бугарија, работи на различни интереси, а еден од нив е и „расипувањето“ на односите меѓу Софија и Скопје.

Петков вели дека рускиот интерес бил фокусиран „да нема европска иднина за Западниот Балкан“.

– Не знам дали акцијата се однесува на ова прашање, но знам дека имаме неколку такви случаи, што мене ми покажува дека некој се обидува да го промени бугарскиот интерес – изјави Петков.

Бугарскиот премиер рече и дека очекува во најскоро време заедничката историска комисија на Северна Македонија и Бугарија да излезе со резултати.

– Колку што сум информиран, напредокот е огромен. Се радувам, дека кога од двете страни има дух да работиме заедно, се постигнуваат успеси – рече Петков пред новинарите за време на посетата на Благоевград.