Руската служба за надворешно разузнавање (СВР) денес објави дека протестите во Србија во голема мера се поврзани со субверзивните активности на Европската Унија, чија цел е да донесе на власт во оваа земја, како што наведува, „раководство лојално на Брисел“.

„Европската Унија го подготвува „српскиот Мајдан“… Според информациите добиени од Руската служба за надворешно разузнавање, сегашните немири во Србија со активно учество на млади луѓе се во многу погледи производ на субверзивните активности на Европската Унија и нејзините земји членки“, се наведува во соопштението што денес го пренесе агенцијата РИА Новости.

СВР наведува дека „целта на европскиот либерален мејнстрим е да донесе на власт во оваа најголема балканска земја раководство кое е послушно и лојално на Брисел“.

Терминот „Мајдан“ во Украина се користи за да се опишат масовните демонстрации во таа земја, кои започнаа на 21 ноември 2013 година, откако тамошната влада, која беше избрана по парламентарните избори во 2012 година, одби да потпише договор за поблиска интеграција на Украина со Европската Унија.

Демонстрациите кулминираа на 22 февруари 2014 година со разрешувањето на украинскиот претседател Виктор Јанукович, по што новата влада на Украина потпиша договор за интеграција со ЕУ на 21 март истата година.