Русија разбира дека Србија е под невиден притисок, изјави Дмитриј Песков, портпарол на претседателот на Руската Федерација, коментирајќи ја изјавата на српскиот претседател Александар Вучиќ за продажба на муницијата на земји во ЕУ.

„Разбираме невиден притисок под кој се наоѓаат Србите. Затоа ситуацијата е многу сложена. Разбираме низ какви тешкотии минуваат Србите“, рече Песков како одговор на новинарско прашање за изјавата на Вучиќ дека Србија е подготвена да продава муниција на Европската Унија, објави руската РИА Новости.

Во интервју минатата недела за германското списание „Цицеро“, Вучиќ рече дека складиштата за муниција на Србија се полни и дека земјата произведува повеќе, особено минофрлачки гранати.

„Нашите складишта се полни со муниција и ние продолжуваме да произведуваме, особено минофрлачки гранати. Произведуваме повеќе муниција од Франција. Им понудив на нашите пријатели во ЕУ да склучат договор за купопродажба и да преземат сè што имаме“, рече Вучиќ.

На прашањето дали муницијата може да заврши во Украина, Вучиќ одговори: „Купувачите можат да прават што сакаат со неа“.

Вучиќ рече дека Србија останува воено неутрална, но е подготвена за посилна соработка со европските партнери во странство, пренесува Нова.рс.