Руси кои бегаат од мобилизацијата на Путин пристигнаа во Белград: „Тој е убиец кој нѐ тера во конфликт што не го сакаме“

Фото: Нова.рс/принтскрин

Поголема група руски државјани попладнево слетаа на аеродромот во Белград. Тие велат дека побегнале од војната и од мобилизацијата што утринава ја најави претседателот Владимир Путин. Русите за Нова.рс велат дека се исплашени, како и дека Путин е „убиец кој ги тера во конфликт што не го сакаат“. Низ солзи велат дека се плашат за своите семејства и дека во Белград ќе бидат со роднини, пријатели или членови на семејството кои претходно веќе дошле во Србија.

Многумина од групата во страв не сакаа да зборуваат пред камерите, обидувајќи се да ја остават војната зад себе и конечно да бидат безбедни, пишува Нова.рс. Има и такви кои ги споделија своите искуства во врска со актуелната криза во Москва и дадоа објаснувања зошто платиле билети и се упатиле кон Белград.

„Мојот сопруг остана во Русија. Многумина мои пријатели добија повик за мобилизација. Мои колеги и млади луѓе воопшто“, вели таа.

Поканите за воена служба, според нејзиното сведочење, пристигнувале на домашните адреси на мобилизираните и пред денешната објава на Путин, а иако властите тврделе дека нема да се повикуваат млади луѓе, токму младите добивале повици за упатување на фронтот.

„Мојот брат е пред Изјум. Го регрутираа, иако има 20 години. Тој веќе трет месец војува во Изјум. Тој отиде во војна на 29 јуни и беше во Изјум и Харков. Не верувајте во сѐ што се кажува од Русија“, вели Јулија.

Друга жена, Ирина, вели дека таа и нејзиниот сопруг допатувале од Москва за да бидат безбедни.

„Многу сум исплашена за моето семејство и пријателите, се разбира и за сопствената безбедност. Пред некое време и ќерка ми дојде во Белград. Сега јас и мојот сопруг дојдовме за да бидеме сигурни. Сакаме да останеме овде“, вели Ирина низ солзи, додавајќи дека е многу тажна и дека не разбира зошто се случила војната во Украина.

Веста за мобилизацијата доведе до нагло поскапување на авиобилетите од Москва кон Србија и Турција – единствените европски земји со кои Русија во моментов има активен авиосообраќај. Речиси и да нема слободно место на овие летови во следните неколку недели, а цените за билет во еден правец достигнуваат и до 3.000 евра.

Видео на денот