Родители, прашавме психолог: Како да не „прегорите“ додека децата се дома на летен распуст?
Летниот распуст за децата е синоним за слобода, игра и бескрајна забава, но за многу родители овој период се претвора во вистински тест за издржливост. Наместо одмор, летото често носи зголемен психолошки притисок, дополнителен стрес и вечното прашање: како да се усогласат работните обврски, домашните задачи и хиперактивните потреби на децата во текот на целиот ден?
Препорачано
За тоа како да се преживее овој период без да се изгуби трпението, за „Слободен печат“ објаснува м-р Ајше Исљам, психолог и гешталт психотерапевт на тренинг, волонтер во Центарот за ментално здравје при Црвениот крст на Македонија.
Таа советува дека клучот не е во строгите правила, туку во паметното менаџирање на времето:
„Корисно е да се воспостави флексибилна дневна структура со неколку предвидливи ритуали кои на децата им даваат чувство на сигурност, но и доволно простор за спонтана игра и истражување.
Исто така, важно е децата да бидат вклучени во секојдневните домашни активности соодветно на нивната возраст. На тој начин развиваат чувство на одговорност, компетентност и припадност во семејството.
Наместо фокус на совршенство, летниот распуст може да се доживее како можност за поголема блискост, заеднички искуства и создавање спомени кои остануваат вечно во сеќавањето“, истакнува Исљам.
Грижата за себе не е луксуз, туку потреба
Најчестата грешка што ја прават родителите во текот на летото е што целосно се ставаат во служба на децата, со што брзо доаѓа до таканаречениот родителски „burnout“ (прегорување). Во желбата да бидат совршени и да ги анимираат децата 24/7, тие забораваат на сопственото ментално здравје
Психологот Исљам апелира дека родителите мора да постават граници за да ја задржат својата емоционална стабилност:
„Особено е важно родителите да останат во контакт со сопствените потреби, емоции и граници. Често, во желбата да бидат добри родители, тие забораваат на себе и се исцрпуваат обидувајќи се да одговорат на сите барања. Грижата за себе не е луксуз, туку предуслов за квалитетна грижа за детето. Дури и кратки моменти за одмор, прошетка, разговор со пријател или активност која носи задоволство и исполнетост можат значително да придонесат за психо-емоционална стабилност“, додава во изјавата за „Слободен печат“.
На крајот, пораката е јасна, совршени родители не постојат, ниту пак на децата им се потребни такви. За успешно лето и среќно семејство, најважно е родителот да биде смирен, присутен и емоционално достапен, бидејќи само така се градат здрави односи и убави спомени кои ќе траат долго откако летниот распуст ќе заврши.
