Рјабков: Москва и Вашингтон не се договорија за екстрадиција на кибер криминалци
Русија и САД не постигнаа договор за екстрадиција на граѓани, поврзани со кибер криминал, изјави синоќа заменикот на министерот за надворешни работи на Русија Сергеј Рјабков.
– Не испорачуваме руски државјани. Тоа е јасен став до кој се придржуваме. Што се однесува на екстрадицијата на странски државјани, немаме договор со САД ни за тоа. Нема таква пракса. Прво треба да се позанимаваме со враќање на нашите државјани кои служат казни поради незаконски пресуди, истакна Рјабков, пренесува ТАСС.
Според него, доколку САД „сакале да ја разјаснат ситуацијата” и да беа подготвени за меѓусебно почитување и конструктивност, можел да се користи договорот меѓу Русија и САД за Заедничка помош во кривичната материја, од 1999 година.
– Потребни ни се регулирани барања и регулирани методи за обработка на овие информации, наместо да објавуваме лаги во медиумите што привлекуваат големо внимание, додаде Рјабков.