Одлуката на Владата за ограничување на маржите на 102 групи на производи или на повеќе од 1.000 прехранбени и непрехранбени производи, како и ограничувањето на маржите на 5 отсто на основните прехранбени производи, какви што се млекото, лебот, брашното, маслото за јадење, јогуртот и киселото млеко, предизвика незадоволство и кај граѓаните и кај трговците. И едните и другите оценуваат дека ова е враќање чекор назад и рециклажа на претходните кошнички, малку надградени и дополнети, со ограничен рок на траење, кој нема да смени ништо, а ќе предизвика хаос на пазарот.

Реакциите се уште поголеми, кога се знае податокот дека како референтни цени се земени оние од 1 февруари, кога веќе најголемиот дел од добавувачите доставија и по неколкукратни поскапувања, како на оние на млекото, јајцата, маслото за јадење, шеќерот, кафето, чоколадите и пекарските производи. Дел од трговците брифираат дека и по вчерашната одлука на Владата, некои добавувачи им најавиле нови поскапувања, што значи дека ниту се фермаат бојкотите, ниту Законот за нефер трговски практики.

Најтажно е што и со овие намалувања и ограничувања, се проценува дека одредени производи ќе се намалат за 3 до 5 денари, што нема да донесе некое поголемо олеснување на животниот стандард.

– Што ќе ми е поевтинување од неколку денари, кога со илјада денари трошок за неколку основни производи, не ни останува ни кусур за гуми за џвакање. Очигледно е дека Владата потклекнала пред притисокот на трговците, на добавувачите и на производителите и направила отстапки што нив би ги задоволиле – разочарани се граѓаните.

Од вчерашниот брифинг на заменик-министерот за економија Марјан Ристески, паѓа во очи и задолжувањето до сите учесници во трговијата на големо и во трговијата на мало, најмалку 70 проценти од стоката што ја носат да биде присутна на рафтовите во трговијата. Неофицијално, ова е предизвикано од заканите дека со вакви маржи им е неисплатливо да работат, па е реално да се очекува некаков тивок бојкот, што ќе рече дел од овие производи ќе ги нема доволно или ќе бидат третокласни, како и во претходните мерки што ги преземаше Владата.

– Очекувам дека ќе ми се намали дотурот на зеленчук и овошје, исто како што се случуваше и во претходните владини акции. Седумдесет проценти од овие производи во моментот се од увоз, па добавувачите ќе имаат оправдување за да не ги носат – брифира еден трговец од Аеродром.

И помалите трговци веќе изразија сериозна загриженост по одлуката на Владата и бараат итна средба со премиерот Христијан Мицкоски и со министерот за економија и труд Бесар Дурмиши за да ги разгледаат последиците од овие одлуки.

– Со вакви избрзани одлуки се нанесува значителна штета на голем број стопански субјекти, кои имаат клучна улога во развојот на економијата – велат од новоформираната трговска комора, која обединува 89 субјекти со 4.700 вработени.

Според нив, овие компании се соочуваат со неизвесност во нивните идни инвестиции и активности, а истовремено се праќа негативна порака до сите потенцијални инвеститори во дејноста.

– Од една страна, се наведува дека основните производи се маржираат од 20-25 отсто, што е причината за ограничувањето на маржата на 5 отсто, но од друга страна се тврди дека нема да има значително намалување на цените. Логично е цените да се намалат за 15-20 отсто, доколку се намали маржата на овој начин. Дополнително, овие одлуки не ги заштитуваат социјално загрозените граѓани, туку најголемата финансиска корист ќе ја имаат потрошувачите со повисоки приходи – реагираат трговците.

Според нив, на пример, во групата месни производи ќе треба се намалат цените и на луксузните производи, што значи дека не се води сметка за приоритетите на граѓаните со пониски примања.