Муската во Македонија често се подготвува со мелено месо и компири, а потоа се прелива со јајца и павлака. Денес има многу различни рецепти за ова јадење, а ние ви го пренесуваме најдобриот. Направете мусака без месо, но исто толку вкусна како и онаа со месо. Комбинацијата од компири, брокула и два вида сирење е едноставно совршена и никој нема да одбие парче.

Состојки:

– 1 брокула
– 500 г компири
– 40 г пармезан
– 55 г путер
– 50 г брашно
– 500 мл млеко
– 1/2 лажичка морско оревче
– моцарела или друго тврдо сирење

Подготовка:

Брокулата исечкајте ја на цветчиња, а потоа кратко бланширајте во зовриена вода. Исечете ги компирите на прстени, па варете ги околу 10-15 минути.

Направете го бешамел сосот. Во тенџере растопете го путерот, па додадете го брашното. Пржете со постојано мешање, додека не добие боја. Потоа, сипете го млекото и цело време мешајте за убаво да се соединат состојките. Зачинете со сол, бибер и посипете со морско оревче. Гответе додека сосот малку не се згусне, постојано мешајќи. Тргнете од шпоретот и додадете го пармезанот, па промешајте.

Тепсијата намачкајте ја со масло, а намачкајте ги и рабовите. Прелијте со бешамел сос да го покрие дното, па наредете ги компирите. Повторно покријте со бешамел, па посипете со рендана моцарела или некое друго тврдо сирење. Наредете ја брокулата и повторно прелијте го сосот, па посипете со сирење. Потоа наредете ги компирите, па прелијте го сосот и посипете го сирењето. Потоа наредете ја брокулата и повторно прелијте со бешамел сосот и посипете со сирење. Печете ја мусаката во загреана рерна на 180 степени околу 35 минути.