Рецепт за мафини од брокула полнети со фета-сирење и јајца
Мафините се одлично решение кога сакате појадок кој лесно се подготвува и кој на сите ќе им се допадне. Покрај познатите слатки верзии, ве предлагаме да ги пробате и солените мафини. Овој рецепт ќе им се допадне дури и на пребирливите луѓе, а комбинацијата од разновиден зеленчук, фета-сирење, пармезан и варени јајца е едноставно совршена.
Состојки:
– 4 јајца
– 1 брокула
– 1 лажица јаболков оцет
– 1/2 кромид
– 1/2 морков
– 1 пиперка
– 60 грама фета-сирење
– 1 лажичка италијански зачин
– 60 грама пармезан
Подготовка:
Брокулата исечкајте ја на помали цветчиња, па ставете во длабок сад со вода во која сте додале оцет. Оставете го така 10 минути. Потоа, брокулата изрендајте ја и измешајте ја со две јајца, па посолете и побиберете. Промешајте да се соединат состојките, а потоа добиената смеса сипете ја во подмачканиот калап за мафини. Притиснете по дното и работ.
Печете во загреана рерна на 180 степени околу 15 минути. Во меѓувреме, сварете ги преостанатите две јајца, а на малку масло во тава пропржете ги ситно исечканите кромид и морков. Кога зеленчукот ќе омекне, додадете ја и ситно сечканата пиперка. Готовиот зеленчук ставете го во сад и додадете ги ситно сечканите варени јајца и издробеното фета-сирење. Посипете со италијанскиот зачин и сè добро соединете.
Наполнете ги мафините од брокула и посипете со пармезан. Вратете ги во рерна и печете уште 15 минути.