Четворица разбојници насилно влегле во угостителски објект во Куманово и украле поголем број маси и столици, соопшти Министерството за внатрешни работи. Полицијата ги најде и ги уапси, а тие го признале делото.

Според информациите, меѓу разбојниците е и 17-годишник.

„На 4 јуни во периодот меѓу 11:00 и 13:00 часот, полициски службеници извршиле службен разговор со четири лица од Куманово: Е.Љ. (22), В.Б. (19), Љ.А. (23) и еден 17-годишен малолетник. Според официјалната пријава, групата со употреба на сила провалила во угостителскиот објект лоциран на улицата „Гоце Делчев“ во Куманово, од каде што одзеле поголем број маси и столови. Во текот на службениот разговор во полициска станица, осомничените во целост го признале извршеното дело и го појасниле начинот на кој ја извршиле кражбата“ соопшти МВР.

По брзата интервенција на полицијата, украдените маси и столици биле пронајдени, конфискувани и веднаш вратени на оштетениот сопственик.

Од МВР додаваат дека по комплетното документирање на случајот, против четирите лица ќе биде поднесена соодветна кривична пријава до надлежното обвинителство.

Уапсен велешанец во Охрид кој физички ги нападнал партнерката и нивното бебе