Радев: Почитувањето на правата на Бугарите во С.Македонија е предворјето за влез во ЕУ
Претседателот на Бугарија Румен Радев повика на почитување на правата на Бугарите во Република С. Македонија и посочи дека тоа е предворјето за нејзина интеграција во Европската унија. Како што јави дописникот на МИА од Софија, Радев ја коментираше и темата за уништените бугарски воени гробишта во Република Северна Македонија.
Тој рече дека случајот го истражуваат бугарското Министерство за надворешни работи и Министерството за одбрана и истакна дека, според него, тоа претставува систематски процес на дебугаризација, процес на заживување на уништувањето на бугарското културно-историско наследство во Република С.Македонија.
-Не случајно го поставив токму ова прашање на Советот во Љубљана. Ова е предворјето на вратата за интеграција на Република С.Македонија во ЕУ- правата на Бугарите, недискриминација, како и нивна целосна интеграција во културниот, економскиот, општествениот и политичкиот живот на оваа земја. Исклучително е важна нашата поддршка за нивните барања да бидат признаени во Уставот на Република С.Македонија, и да бидат свечено прогласени од претседателот, владата и парламентот на Република С.Македонија, додаде Румен Радев. Бугарија категорично ќе реагира, и повеќе нема да остави ниту еден таков случај, додаде Радев, според кого вистинскиот проблем е дебугаризацијата и дискриминацијата на луѓето со бугарски идентитет во Република С. Македонија.
Според потпретседателката на Бугарија, Илијана Јотова скеврнавењето на гробовите на бугарските војници во Република Северна Македонија”, е „многу долга сага” . Таа додаде дека во 2010 година во Европскиот парламент, бугарската делегација го поставила ова прашање, како и тоа дека имало и мисија во Република Северна Македонија во врска со тоа, во која учествувале европратеници од други држави членки на ЕУ.
Извор: МИА