ВИДЕО: Пукање во Хамбург, седуммина убиени во црква на Јеховините сведоци
Најмалку седуммина луѓе загинале, а повеќе од 20 се повредени во пукање во северниот германски град Хамбург, јавија германските медиуми, повикувајќи се на службите за итни случаи.
Локалниот „Моргенпост“ објави дека седуммина од ранетите имаат сериозни повреди, а 17 луѓе се полесно повредени во крвавиот напад, за чијшто мотив засега нема информации.
Полицијата во Хамбург на Твитер објави дека имало голема полициска операција во округот Алстердорф и дека пукањето се случило во центар на Јеховините сведоци на улицата „Делбеге“ во областа Грос Борстел, пренесе „Би-би-си“.
Пукањето се случило на настан организиран од верската организација на Јеховините сведоци, на кој се собрале поголем број луѓе. Сите убиени имале рани од огнено оружје, додаде полицискиот портпарол, кој рече и дека напаѓачот или напаѓачите најверојатно се меѓу загинатите.
BREAKING:
At least 14 shot in a mass-shooting in Hamburg, Germany.
6 people have been killed. pic.twitter.com/yJ0Ju6dCkG
— Visegrád 24 (@visegrad24) March 9, 2023
Преку федералната апликација за предупредување, NINAwarn, било испратено предупредување дека околу 21:00 часот по локално време, „еден или повеќе непознати напаѓачи пукале во луѓе во црква“. На жителите во близина им било кажано да не ги напуштаат своите домови поради тековната операција.
Полицијата наведе дека засега не се знае мотивот на нападот и ги замоли медиумите и граѓаните да не шират непотврдени информации.