Лоик де Мари формално добил дијагноза психопат кога бил тинејџер, по PCL-R тестот на кој се подложуваат и затвореници, пишува „Дејли Мејл“. Психопатијата е состојба во која луѓето немаат емпатија, се однесуваат себично и можат да дејствуваат штетно или криминално.

Де Мари истакна дека она што го разликува од просечната личност е што речиси не чувствува длабоки емоции, особено вина или каење. Тој смета дека клучната разлика која дефинира вистински психопат е целосно занемарување на последиците од своите постапки и колку сериозно повредува другите, ментално и физички.

„Што и да сум направил, не се каам. Ќе живеам само еднаш и тоа ќе го направам за себе. Воопшто не се каам“, рекол Де Мари за поткастот „People Are Deep“.

Овој Белгиец изјави дека вознемирувачките настани кои покажуваат дека е психопат се враќаат во неговото детство, вклучувајќи го рамнодушното набљудување на сопствената сестра кога таа се давела, без обид да ја спаси.

И покрај тоа што имал тешко детство и живеел во сиромаштија, Де Мари е убеден дека неговата состојба е генетска и нема врска со животните околности.

Сепак, додаде дека добивањето дијагноза всушност било корисно, бидејќи никогаш не чувствува анксиозност, депресија или вина, останува смирен под притисок и може да донесува безмилосни одлуки без емотивна болка.

Целосно смирен и со многу малку емоции, Де Мари детално опиша како извршувал насилство и дури бил уапсен, но не чувствувал дека направил нешто лошо. Тој се сети како полицајците еднаш го фатиле додека се подготвувал да нападне три момчиња со бејзбол палка и го ослободиле со предупредување. Меѓутоа, целосно го игнорирал предупредувањето и два дена подоцна му го скршил носот на едно од момчињата.

„Бев уапсен и одведен во полициска станица. Не ме интересира што ќе се случи. И не размислувам за последиците од моето однесување“, изјавил Де Мари.

Призна дека спиел со поранешната девојка на својот најдобар пријател и години потоа лажел за тоа, бидејќи неговата состојба го правела тоа да изгледа возбудливо.

„Кога сте психопат, склони сте да верувате дека луѓето не се паметни. Затоа ги користите. Го гледате човекот како објект. Мислите дека се глупи. Можете да добиете што сакате од нив. Затоа ги манипулирате луѓето“, објаснил Де Мари.

Дури раскажа за случај кога ја одвел мајка си да ја посети пријателка која умирала за да се зближи со ќерката на таа жена, без да се грижи за страдањето на пријателката. „Ако човек треба да умре, тоа не е моја работа“.

Белгиецот привлече големо внимание со јавниот говор за дијагнозата и признанијата како повредувал други низ годините. Иако многумина тврдеа дека неговите јавни признанија ќе му го уништат животот, дијагностицираниот психопат вели дека се случило спротивното.

Тој работи како советник за постигнување успех во животот и учи луѓе како да препознаат и избегнат манипулација, користејќи го своето психопатско знаење за да им помогне на другите. Тоа го нарекува својот „искуп“ бидејќи заработува пари, почит и престиж преку својата експертиза, што дополнително го поттикнува неговиот нарцизам – уште една клучна особина на психопатот.

„Можам да добијам што сакам без да уништам некого. Тоа е како договор со луѓето“.

Де Мари изрази верување дека многу успешни луѓе, вклучувајќи директори и банкари кои предизвикале финансиска криза во 2008 година, можеби се психопати, бидејќи можат да донесуваат ладнокрвни, рационални одлуки без емоции. Таквите луѓе би ја користеле психопатијата за своја корист, останувајќи фокусирани, ризикувајќи и добивајќи пари или моќ без чувство на вина поради повредување на другите.

Иако Де Мари изјавил дека никогаш не доживува анксиозност или депресија, студиите го оспориле тоа, откривајќи дека оние кои покажуваат психопатија и макијавелизам, со желба да манипулираат со другите, имаат повисоки стапки на депресивни симптоми.

Студија од февруари 2025 година вели дека психопатите можат тивко да страдаат од ефектите на изолирање од другите.