Пациентот на 62-годишна возраст кој вчера почина во Тетово како последица од компликации од коронавирусот, имал примено две дози од вакцината на Синофарм, потврдуваат официјално од Општата болница Тетово за „Слободен печат“.

– Да, пациентот имал примено две дози вакцина. Вакциниран бил со Синофарм. Првата доза ја примил на 17 мај, а втората доза на седми јуни. Пациентот беше хоспитализиран во тетовската болница и имаше коморбидитети меѓу кои хронична бубрежна болест, кардиомиопатија и хипертензија. Дојде во болница со покачена телесна температура и рутински го тестиравме на ковид и беше позитивен, изјави за „Слободен печат“ доктор Гзим Нуредини од Општата болница во Тетово.

Како што неодамна во изјава за Слободен печат објасни д-р Александар Петличковски од Институтот за имунологија, за вакцината на „Синофарм“, потребни девет недели од првата доза додека да се создаде целосниот имунитет.

– За вакцината на „Синофарм“ генерално треба да се знае дека се работи за мртва вакцина и таа создава имунитет малку подолго отколку американските вакцини и треба граѓаните да се внимателни помеѓу двете дози и неколку недели по втората доза. Комплетниот имунитет што се развива кај „Синофарм“ вакцината се постигнува после 6 недели по втората доза. Тоа е доста долг период, односно 9 недели од почетокот на вакцинацијата за достигнување на максимална ефикасност, изјави Петличковски.

Починатиот од Тетово, втората доза ја примил на 7 јуни, што значи дека поминале осум недели од примена втора доза.