Издавачката куќа „Прозарт медиа“ стана првиот член од Македонија на престижната Интернационална алијанса на независни издавачи. Во Алијансата, којашто е оформена во 2002 година, членуваат повеќе од 800 издавачи од сите континенти, односно од шеесетина земји.

Алијансата се стреми кон промоција на независните издавачи, служи како место за експериментирање и размислување преку Опсерваторијата за библиодиверзитет, но и како лабораторија за алтернативни уредувачки практики. Алијансата организира и вмрежувања на издавачите членови, онлајн саеми на книга итн.

Една од целите во програмата 2022-2025 е потврдување и бранење на слободата и еднаквоста на говорот, а Алијансата ќе се бори и за враќање на рамнотежата помеѓу земјите извознички на книги и земјите увозници.

– Преговорите за влез во Алијансата започнаа во 2022 година на Саемот на книгата во Франкфурт, каде што „Прозарт медиа“ и уредникот Дејан Трајкоски беа поканети во престижната „Invitation program“ заедно со 20 одбрани издавачи од целиот свет. Неколку од авторите на „Прозарт медиа“ веќе се претставени и промовирани пред издавачите на Алијансата – истакнуваат од издавачката куќа „Прозарт медиа“.

„Прозарт медиа“ е организатор на Интернационалниот литературен фестивал „Про-За Балкан“ и на „Скопје фелоушип програмата“.