По сите случувања околу спотот, потоа и изјавата дека поседува двојно државјанство, не престануваат превирањата околу нашиот годинешен претставник за „Евровизија“.

Прво на Интернет се појавија две онлајн петиции. Во едната се бара да се повлече Македонија од учеството, а во другата само да се повлече Васил како претставник.

Потоа на Интернет се појави исто така онлајн петиција за поддршка на Васил. Сега македонскиот претставник на својот Инстаграм – профил сподели фотографии со изрази на поддршка од целиот свет и новото т.н. движење #HereIStandWithVasil, именувано по неговата песна „Here I Stand“.

Поддршката што тој ја добива е од обожаватели на манифестацијата, дури од Латинска Америка, но и од официјалните евровизиски тимови.

На крај од објавата Васил сподели „скриншот“ од видеото од песната „Ѓердан“ испеана за Македонија и напиша подолг текст, кој завршува со:

„Ех, да си моиве очи денес, татковино моја! Дај ми сила да издржам за да можат да ја слушнат вистината!“

Во меѓувреме, МРТВ најави дека ќе го преиспита целиот случај и ќе излезе со официјален став.