Подготовките за Зимските олимписки игри во 2026 година во Милано и Кортина беа далеку од совршени. Дали треба да се промени моделот на домаќинство на Олимписките игри?

Подготовките за Зимските олимписки игри во 2026 година во Милано и Кортина беа далеку од идеални. Лизгалиштето беше одложено и имаше многу проблеми. Боб-патеката е контроверзна од самиот почеток. Историјата покажува дека многу домаќини на Зимските олимписки игри имале проблеми и со доцнења во изградбата на местата за натпревари, како и со зголемените трошоци. Но, можеби 2026 година ќе биде пресвртница.

„Искрено, ова е неоправдано, особено за нешто како повеќенаменска арена“, изјави Виктор Матисон за Дојче Веле, осврнувајќи се на доцнењето во изградбата на лизгалиштето.

„Можеби е малку поразбирливо со специјализирани објекти што мора да се изградат специјално за Олимписките игри, но од економска перспектива, ако веќе немате објекти, како што е голема затворена арена што може да се користи за хокеј, веројатно не треба воопшто да се кандидирате за Олимписките игри“.

Матисон е професор по економија на Колеџот на Светиот Крст во Вустер, Масачусетс, а неговата експертиза е економските ефекти од големите спортски настани.

Проценетиот буџет за Зимските олимписки игри во 2026 година е повеќе од три милијарди евра, пренесува „Ројтерс“. Некои извештаи сугерираат дека економскиот стимул од Игрите ќе биде околу пет милијарди евра, на пример преку туризам и надградби на инфраструктурата. Сепак, таа бројка останува само проценка.

Историјата исто така покажува дека, за жал, премногу Игри страдаат од истиот синдром – дека скапите стадиони и објекти остануваат неискористени со текот на времето. Прашањето дали воопшто вреди да се организираат Олимписките игри е поставено и претходно, но можеби оваа година е време конечно да се сфати посериозно.

Зимските олимписки игри во Милано и Кортина ќе се организираат од 6 до 22 февруари 2026 година.