Пејачката Кристина Арнаудова со искрена емоција зборува за празничната магија што ја носи Новата година, за силата што ја открила во себе во текот на 2025, за трансформациите, љубовта и вербата што ја водат напред.

Во разговор за „Слободен печат“ исполнет со празнична топлина, таа се навраќа на детските спомени, семејните традиции и желбите што веќе ги „спакувала“ под новогодишната елка.

На која традиција од детството секогаш се сеќаваш кога ќе започне новогодишната магија?

– Како мала многу се радував на Новата година, на китењето на елката, но најмногу на пакетчињата што ги добивав, а ги имаше во голем број. Сакав да ги редам под елката и да бидат што повеќе. Потоа имавме една наша традиција што ја викавме „Попис“ – ги отворавме сите подароци и броевме колку чоколади, бонбони и колачиња имаме.

Новата година секогаш ме потсетува на баба ми и дедо ми, бидејќи секогаш бев со нив и ми беше преубаво.

Која е најважната лекција што ја научи во 2025 година?

– 2025 беше убава година што многу ми донесе знаење, љубов, развој и многу лекции. Не знам дали можам да издвојам една конкретна, но научив дека човекот во себе има сила за која често не е свесен. Таа сила се буди токму тогаш кога мислиме дека сме на дното. Начинот на кој ја користиме таа сила и ја будиме, нè дефинира нас и нашата иднина. Силата и вербата што ми ги донесе 2025 година се нешто на кое сум најблагодарна.

Кој момент од годината би го издвоила како најголем успех или пресвртница?

– Немаше еден конкретен момент, целата година беше година на трансформации, патувања, работа и многу љубов. Летото беше за одмор, есента за работа, а зимата за благодарност. Целата 2025 година ја доживувам како година на развој и учење од секој аспект.

Што би сакала да оставиш зад себе во 2025, а што дефинитивно го носиш со себе во 2026 година?

– Не сакам да оставам ништо зад себе. Секој момент, сакала или не, веќе е зад нас. Но сакам сите моменти од 2025 година засекогаш да ги чувам во срцето.

Што беше твоја најголема инспирација?

– Најмногу ме инспирираше сопствената сила и верба.

Која желба за 2026 година ќе ја спакуваш под елката?

– Во 2026 година сакам да патувам на далечни дестинации, неколку такви патувања ми се голема желба. И секако, многу љубов и здравје. Без тоа, ништо!

И за крај, дали го накити домот заедно со семејството и каде ќе ја дочекаш Новата година?

– Кај нас дома китењето на елката е цела церемонија со музика и многу радост. Тој момент навистина го сакам. Новата година ми е особено драга затоа што носи радост и среќа. Новата година ќе ја дочекаме со семејството на планина, заедно со многу драги пријатели како и секоја година