„1.000 потписи! Едно големо браво до сите! Преку 1.000 од вас ја поддржаа петицијата за унапредување на „Сејф Сити системот“ – ова денеска го објави граѓанската иницијатива „За почиста Македонија“, чии претставници ја доставија до Владата и Министерството за внатрешни работи петицијата со која се предлага да се разгледа можноста камерите од системот „Сејф сити“ да бележат и казнуваат фрлање отпад и отпушоци од возила.

„Заедно сме погласни. Очекуваме да нè чујат и будно следиме за одговор“, соопштија од „За почиста Македонија“.

Тие претходно побараа од граѓаните да се потпишат, бидејќи, како што рекоа, прво е еколошкото загадување.

„Отпушоците се најчестиот вид отпад пронајден по улици, тротоари и покрај патишта. Еден отпушок содржи токсични материи како никотин, олово, арсен и стотици хемикалии што ја загадуваат почвата и водата. Потребни се и до 10 години за целосно да се разградат, а микро-пластичните влакна од филтерот завршуваат во земјата и реките“, стои во петицијата.

Меѓу аргументите за бараните измени се и тоа што фрлањето отпушоци е сериозна закана за јавната безбедност, односно за предизвикување пожари.

„Со оглед на тоа дека камерите на „Сејф сити“ веќе препознаваат минување на црвено светло, неправилно паркирање, пребрзо возење и слично, системот може да се надгради со алгоритам за детекција на фрлање предмети од возило, практика која веќе ја има во повеќе европски земји и градови. Ова е реално изводливо, без големи дополнителни трошоци“, се вели во петицијата.