Напредокот на државата во однос на евроинтеграциите и внатрешно-политичката состојба пред претстојните парламентарни и претседателски избори, беа во фокус на денешната средба на премиерот Талат Џафери и европратеникот Илхан Ќучук, известител во Европскиот парламент за Македонија.

Како што соопштија од Владата, Џафери на средбата порачал дека членството во Европската Унија останува стратешка цел на Македонија, а останува и исполнувањето на обврските кои се дел од преговарачката рамка со Унијата.

Изразувајќи благодарност за досегашната блиска и активна соработка со европратеникот Ќучук во изминатите четири години, премиерот Џафери го нагласи задоволството од поддршката на Ќучук во промоцијата на европското досие на Северна Македонија во Европскиот парламент и неговиот личен придонес во носењето важни одлуки за земјата. Последен успешен пример во таа насока беше процесот на „Дијалогот Жан Моне“, во рамки на кој се одвиваа разговорите за новиот Деловник на Собранието, кој беше усвоен со консензус од пратениците – се вели во соопштението.

Џафери и европратеникот Ќучук размениле ставови и за постигнатите реформи во државата како и за динамиката на односите на земјите од Западен Балкан со Европската Унија.

Двајцата соговорници се согласија дека продолжувањето на процесот на проширување е во интерес на Европската Унија, а на тој начин државите од Западен Балкан ќе бидат фокусирани на засилувањето во спроведувањето на реформските процеси, се додава во соопштението.

Ќучук истакнал дека земјата и натаму ќе може да смета на неговата поддршка и изразил надеж дека по претстојните избори за пратеници во Европскиот парламент, ќе има можност да продолжи да придонесува за побрза интеграција земјата во ЕУ.