Жителите во областа Атика, која ја опфаќа и Атина, се предупредени да избегнуваат непотребни излегувања, откако силниот дожд предизвикан од бура Брајон ги претвори улиците во надојдени потоци, објавија грчките медиуми.

„Предупредување за силни временски појави, со прекини, до утре напладне во регионот Атика. Избегнувајте непотребни движења. Бидете внимателни во подземни простори. Следете ги инструкциите од надлежните“, стои во известувањето испратено во 19 часот преку системот 112 од Службата за цивилна заштита.

Во повеќе делови од главниот град улиците се претворени во реки, а електричните празнења во атмосферата се особено интензивни. Противпожарната служба во Атина досега примила 47 повици за испумпување вода, а пријави стигнуваат и од Елефсина, Аспропиргос и Пиреја.

Бурата предизвика сериозни сообраќајни метежи на голем број главни градски сообраќајници.

Поради невремето, сите јавни и приватни основни и средни училишта во областа Атика ќе останат затворени во петок. Вечерните училишта во регионот ќе бидат затворени и денес, во четврток.