Војната на Блискиот Исток ги зголеми цените на нафтата и доведе до блокада на Ормускиот Теснец, клучна точка низ која поминуваат околу 20 отсто од глобалните испораки на нафта и течен природен гас. Со ова, поскапи сѐ, вклучително и горивото, резервните делови и сервисот за такси-возилата.

Превозници со кои разговараше „Слободен печат“ сметаат дека такси-услугата во Скопје треба да поскапи за да можат таксистите да ги подмируваат давачките. Тие се повикуваат на случувањата во Охрид, каде што Советот донесе одлука за нови цени од 6 мај, при што стартната цена останува 50 денари, но секој изминат километар ќе се наплаќа по 50 денари. Во ноќниот период стартот е дури 100 денари, што е скок од над 50 отсто. Корекција на цените е извршена и во Куманово. Таму ќе се наплаќа 100 денари за првите два километри, а секој нареден – по 40 денари.

Во Охрид паркингот поскапува за 30 отсто, такси превозот станува изгор

Од друга страна, Сашо Рајчановски, претседател на Групацијата на авто-такси превоз на Град Скопје, вели дека скопските таксисти веќе возат по повисока тарифа. Станува збор за покачување од пет денари за километар, предвидено уште од 2022 година, а кое сега во последниве месеци се применува поради ценовните шокови.

– Во 2022 година, кога ја менувавме цената на такси-превозот, тогаш ставивме три тарифи. Едната е доколку цената на горивото значително падне – практично цените од пред 15 години. Втората тарифа ја употребувавме од 2022 година, кога имаше инфлација, а третата е ако цените на горивото дополнително растат, што е случајот во изминатиов период. Тарифите веќе неколку години се поминати на Советот на Град Скопје, не се новитет, важат и денеска – посочува Рајчановски за „Слободен печат“.

Како што објаснува тој, првата тарифа предвидувала стартна цена од 40 денари и 25 денари по километар, втората е 50 со 30, додека третата, моментална тарифа по која возат таксистите е старт 60 со 35 денари за изминат километар.

Оттука, според него, нема простор за дополнително покачување во Скопје по примерот на Охрид и на Куманово, бидејќи економската ситуација и растот на цените на нафтата и на производите веќе се „пресметани“ во тарифникот.

– Можеби оваа цена некому му е мала, но таа е веќе предвидена поради заштита од вакви ситуации. Тоа е минимално покачување, но, со оглед каков е стандардот на граѓаните, не можеме да одиме уште погоре. Ако одиме, кој тогаш ќе се вози во такси? Да, такси-трошоците можеби диктираат уште поскапа тарифа, но мораме да се држиме до усвоеното, бидејќи знаеме каде и како живеат граѓаните. Веруваме дека горивото нема да оди уште нагоре, ќе се стабилизира или ќе почне да паѓа. Затоа, нема потреба за покачување, а и нема такво барање од такси-компаниите во официјалните меѓусебни разговори – нагласува Рајчановски.

Лиценцираните таксисти чекаат подобри услови

Скопските таксисти веќе изготвија решение за главните предизвици во такси-дејноста (проблеми со жолтите таблички, такси-возила без лиценци, без фискални таксиметри, непријавени такси-возачи, необоени такси-возила). Решението веќе му го презентираа на градоначалникот на Град Скопје, Орце Ѓорѓиевски. Барањата се пратени на средината на февруари 2026 и до Секторот за сообраќај, Инспекторатот на Град Скопје и до Советот.

– Испративме барања, со цел сите да знаат кои ни се проблемите, но и како тие да се решат. Исто така, нагласивме колку пари се губат со тоа што не се решаваат – шест милиони евра годишно. Тоа е минимум! Оттука, чекаме да се реши ситуацијата. Не сакаме да водиме политика, само укажавме на тековните состојби. Сакаме да има брз, безбеден и европски такси-превоз, во интерес на сите, и на таксистите и на граѓаните – констатира Рајчановски.

Низ Скопје возат околу 4000 таксисти, од нив само 200 се вработени: Ќе се реши ли хаосот?