Поранешен хакер на ЦИА доби 40 години затвор бидејќи објавил информации на Викиликс
Поранешен службеник на ЦИА е осуден на 40 години затвор поради објавување информации на Викиликс, пренесува Би-Би-Си.
Тој е осуден по повеќе обвиненија: шпионажа, компјутерско хакирање, непочитување на судот, давање лажни изјави до ФБИ и поседување слики за сексуална злоупотреба на деца.
„Џошуа Шулте ја предаде својата земја со извршување на некои од најгрозоморните злосторства на шпионажа во американската историја“, рече јавниот обвинител.
Шулте ги отфрли сите обвинувања. Обвинителите го обвинија дека ги обелоденил алатките на ЦИА „Волт 7“, кои им дозволуваат на разузнавачите да хакираат телефони и да ги користат како уреди за слушање.
35-годишниот Шулте му дал на Викиликс околу 8.760 документи во 2017 година, што е најголемото нарушување на податоците во историјата на ЦИА, соопшти американското Министерство за правда.
Според Си-Ен-Ен, Шулте бил вработен како програмер во Центарот за сајбер разузнавање, кој шпионира терористички организации и странски влади. Обвинителите на судењето изјавија дека во 2016 година тој ги украл информациите и ги дал на Викиликс, а потоа ги излажал агентите на ФБИ за неговата улога. Тие рекоа дека бил мотивиран од гнев поради спор на работното место.
Шулте се борел да ги исполни роковите, а помошникот на американскиот обвинител Мајкл Локард рече дека еден од неговите проекти е толку многу заостанат што го добил прекарот „Дрифтинг дедлајн“. Обвинителите рекоа дека сакал да ги казни оние за кои сметал дека му згрешиле.
Агенти на ФБИ разговарале со Шулте неколку пати откако Викиликс ја објави информацијата, каде тој негирал одговорност.
По претресот на неговиот стан, соопштија обвинителите, подоцна биле откриени десетици илјади слики од материјали за сексуална злоупотреба на деца.
Тие додаваат дека и по апсењето, Шулте се обидел да му даде на Викиликс уште повеќе информации. Тој прошверцувал телефон во затворот каде што се обидел да испрати на новинар информации за сајбер групите на ЦИА и составил твитови во кои имало информации за сајбер алатките на ЦИА под името Џејсон Борн. Тој е во затвор од 2018 година.
