Поетската збирка „Еx Voto“ на Соња Здравковска Андоновиќ ќе биде промовирана во „Ко-Ра“
Промоцијата на поетската збирка „Ex Voto“ на м-р Соња Здравковска Андоновиќ ќе се одржи на 12 април, со почеток во 19.30 часот, во галеријата „Ко-Ра“ во големиот салон на ЈУ Дом на културата „Кочо Рацин“, спроти гимназијата „Јосип Броз Тито“ во центарот на Скопје.
Промотор на книгата ќе биде проф. д-р Ана Мартиноска, додека улогата на модератор ќе ја има телевизиската водителка Александра Велинова. Книгата е издание на „Дијалог“ од Скопје.
Авторката Соња Здравковска Андоновиќ е родена на 5.3.1972 година, во Битола. Дипломирала на Филолошкиот факултет на Универзитетот „Св. Кирил и Методиј“, на катедрата за македонска книжевност и јужнословенски книжевности со македонски јазик во 1996 година. Завршила магистерски студии на Институтот за македонска литература при Универзитетот „Св. Кирил и Методиј“ во Скопје во 2012 година.
Таа работи како професорка по македонски јазик и литература во средно образование од 1996 година. Пишува поезија од најрана возраст. Во наставата, своите ученици несебично ги запознава со убавините на пишаниот збор, но и со убавината на македонскиот јазик.
(Текстот е објавен во „Културен печат“ број 174, во печатеното издание на весникот „Слободен печат“ на 8-9.4.2023)