Нешто по 18 часот во зградата на претседателството започнала средбата меѓу претседателот на Србија, Александар Вучиќ и специјалниот претставник на Европската унија за дијалогот меѓу Белград и Приштина и други регионални прашања за Западен Балкан, Мирослав Лајчак, пренесуваат регионални медиуми.

Портпаролот на Европската комисија Петер Стано претходно денеска потврди дека Лајчак ги поканил главните преговарачи на Белград и Приштина да ги продолжат разговорите во вторник на 19 март, за одлуката на таканаречената Централна банка на Косово да го укине динарот, која се донесе пред неколку недели.

Американскиот претставник за Западен Балкан, Габриел Ескобар, кој во последните неколку дена престојуваше во Приштина, рече дека не успеал да го убеди премиерот на Косово, Албин Курти, да одговори за загриженоста на Западот во врска со забраната за употребата на динарите во Косово, но дека се надева дека на средбата на главните преговарачи во вторник во Брисел ќе се најде итно решение.