По долго боледување, на 53-годишна возраст почина новинарката на МИА Ирена Радовановиќ, една од препознатливите фигури во македонското новинарство во изминатите децении.

Новинарската кариера Радовановиќ ја започна во неделникот „Фокус“ во 1991 година, каде работеше до 2001 година, по што продолжува во „Вечер“ како новинар во внатрешно-политичката рубрика. Во 2004 година станува дел од редакцијата на „Нова Македонија“, а од 2006 и 2007 г. на дневниот весник „Македонија денес“ и неделникот „Денес“. Работела и во политичкиот неделник „Форум“, во весникот „Дневник“ и во радиото „Слободна Македонија“.

Дел од тимот на новинската агенција МИА станува во 2014 година како новинар во внатрешно-политичката редакција и новинар-аналитичар. Со нејзиното заминување, македонското новинарство загуби посветен професионалец, кој трајно ќе остане запаметен.

Погребот ќе се изврши утре на гробиштата во Радишани во 11:00 часот (капела во 10:30).