По планот на Вучиќ цел З. Балкан да влезе во ЕУ, црногорскиот премиер му порача: „Ве чекаме таму од 2028 година, побрзајте“
Премиерот на Црна Гора, Милојко Спајиќ, го коментираше предлогот на српскиот претседател Александар Вучиќ – сите држави од Западен Балкан да ѝ се приклучат на Европската Унија во исто време. Спајиќ, сепак, му порача на Вучиќ дека Црна Гора ќе биде членка на ЕУ во 2028 година и дека таму ќе ги чека останатите земји, пренесе „Политика“.
Препорачано
„Се согласувам дека ЕУ треба да биде крајната дестинација за целиот Западен Балкан. Сепак, ние ќе ве чекаме таму уште во 2028 година и ве охрабруваме навистина да побрзате и да ги забрзате другите кандидати од регионот“, објави Спајиќ на социјалната мрежа X.
Saglasan sam da bi čitavom Zapadnom Balkanu EU trebalo da bude finalna odrednica.
Međutim, mi ćemo vas tamo čekati već od 2028. godine i navijamo da istinski požurite i ubrzate ostale kandidate iz okruženja. 🇲🇪🇪🇺 pic.twitter.com/ldU0x03QL9— Milojko Spajić (@MickeySpajic) December 9, 2025
Српскиот претседател Александар Вучиќ претходно во вторникoт изјави дека најдобрата опција за ЕУ би била да ги прими сите земји од Западен Балкан како полноправни членки во исто време.
„Ако прифатите една, две или три од нас, тогаш што ќе правиме со другите? Како ќе ги решиме сите отворени прашања?“, рече Вучиќ на панелот „Европска конкурентност во фрагментирана геополитичка средина“ на форумот BELTALKS во Белград.
Тој додаде дека ќе ја презентира оваа идеја на состанокот со претседателката на Европската комисија, Урсула фон дер Лајен, и претседателот на Европскиот совет, Антонио Коста. Според него, заедничкиот прием би придонел за стабилноста на регионот и Европа.
